Tá lógó na hInstitiúide bunaithe ar bhád Naomh Breandáin, an Loingseoir. Rugadh Naomh Breandán i bhFianait, 12km siar ó Thrá Lí sa bhliain 483 AD agus fuair sé bás sa bhliain 562AD. Bhunaigh sé mainistreacha in Ard Fhearta agus i gCluain Fearta. Is iomaí aistear farraige fionnachtana a dhein sé lena mhanaigh. Cuirtear na haistir seo i gcroinic i "Navigato Brandani", a breacadh i lámhscríbhinn den chéad uair sa bhliain 750AD.
Roghnaigh an Institiúid an tsiombail seo chun nádúr an ardoideachais a chur in iúl. Léiríonn sí an t-aistear fhás pearsanta agus féinfhollasaithe nach mór do gach mac léinn a dhéanamh. Léiríonn sí dul i ngleic leis an domhan mór, chomh maith. Is siombail é an seol lán den chabhair a gheibhimid ar ár n-aistear ó bhaill eile den phobal acadúil; cuireann na maidí rámha an obair throm nach mór dúinn féin a dhéanamh chun ár gcuspóirí a bhaint amach i gcuimhne dúinn; taispeánann an réalta cad é chomh fada a fhéadaimid dul.
Bhíodh an-tóir ar scéalta an 'Navigato' sa tréimhse luath-meánaoiseach, go háirithe i measc oilithreach go Santiago di Compostela. Deirtear go raibh Críostóir Colambas eolach ar an Navigato sarar imigh sé ar a aistear go dtí an Domhan Nua sa bhliain 1492. D'fhill Tim Severin ar choischéim Bhreandáin agus a mhanach i roinnt dá n-aistir, le déanaí.
Cuireann na haistir na cuairteanna seo a leanas san áireamh: cuairteanna chuig oileáin na gcaorach (Oileáin Faró); an tír ina mbriseann tine amach tríd an leac oighir (An Íoslainn); an tír ina bhfuil failltecha leac oighir ar feadh an cladaigh (An Ghraonlainn); tír an cheo atá plódaithe le héisc mhóra (Talamh an Éisc) agus na tíortha ó dheas, le farraigí níos teo agus spéir níos goirme. Scríobhann an/na croiniceoir(í) ní hamháin faoi na haistir a bhaineann le fionnachtain fhisiciúil, ach faoin aistear fionnachtana laistigh den duine féin, a bhaineann le láidreachtaí agus laigí an duine agus é ag tabhairt aghaidh ar aistear an tsaoil féin.